Грција мора да ги симне прангите на еврото за да опстане, доколку не сака постојано да бара помош од владите во еврозоната, смета претседателот на надзорниот одбор на германската „Commerzbank“, Клаус-Петер Милер.

„Колку им се потребни, уште 15 милијарди? Ако мислите дека тоа се последните 15 милијарди коишто погрешно ги пресметале, тогаш нека ви е со среќа“, изјавил Калус-Петер Милер на собирот на банкарската структура во понеделникот во Франкфурт, пренесува Reuters.

„Ќе бараат уште и на тоа нема да има крај, освен ако навистина не спроведат структурни реформи, но за тоа нема да им бидат доволни две до три години, туку 20, 30 или 40 години“, дополнил Милер.

Претседател на надзорниот одбор на германската банка „Commerzbank“ рекол и дека Грција не би имала никаква полза од тоа што владите во еврозоната и натаму би ја принудувале да ги носи „оковите“ на единствената европска валута, која овозможува само внатрешни прилагодувања по пат на намалувањето на потрошувачката и на платите.

„Кога сé ќе се земе предвид, на Грците им е потребна валута којашто можат да ја девалвираат“, изјавил Милер, додавајќи дека ќе мине многу време пред владата во Атина да може одново да гради ефикасни структури за да ја поврати конкурентноста.

Атина и нејзините партнери во Европската унија долго време ја исклучуваа можноста на грчкото истапување од еврозоната, што би можело да ја подбутне ЕУ во уште подлабока криза. Потоа на почетокот од јануари, портпаролот на грчката влада сепак изјави дека земјата ќе мора да ја напушти еврозоната доколку со меѓународните кредитори не успее да го договори вториот пакет помош во висина од 130 милијарди евра./крај/ро/мф/сн

Copyright 2012 makfax Сите права се задржани. Текстот не смее да се печати или емитува, во целина или во делови без договор со Мakfax.

  0     0