02 февруари 2012 - 06:02 PM

Бесими: ФИРОМ е едно од решенијата за влез во НАТО

Република Македонија во рамки на ОН веќе ја користи привремената референца. Тоа е едно од решенијата кое е дефинирано уште од осамостојувањето на Македонија, како можност да членува во меѓународните институции.

Република Македонија во рамки на ОН веќе ја користи привремената референца. Тоа е едно од решенијата кое е дефинирано уште од осамостојувањето на Македонија, како можност да членува во меѓународните институции.

Ова денеска во интервју за Гласот на Америка програма на македонски јазик го изјави македонскиот министер за одбрана Фатмир Бесими, одговарајќи на прашањето дали Македонија би се согласила да влезе во НАТО под референцата ФИРОМ.

Според Бесими, независно од исходот на самитот на НАТО во Чикаго, Македонија треба да продолжи со остварување на целта – евроатланската интеграција.

„Македонија треба да работи за својата цел – тоа се евроатланските интеграции – до и после Чикаго. Ако стане, или ако не стане членка во Чикаго, интересот на Република Македонија во однос на спроведувањето на реформите и стандардите на НАТО е нејзин стратешки приоритет во правец на безбедноста и стабилноста“, вели Бесими.

Министерот за одбрана за време на денешната посета на Пентагон се сретна со заменик-помошникот секретар за одбрана Џозеф МекМилан, при што било разговарано за унапредување на соработката меѓу САД и Македонија на армиски план.

„На средбите во Пентагон се потврди тоа што постојано го слушаме од САД - дека се наш сериозен и стратешки партнер. Поддршката на САД за членство во НАТО и натаму останува, со тоа што како членка на Алијансата, укажуваат на потребата да имаме заедничко прифатливо решение за надминување на разликите со Грција“, рече Бесими.

За евентуалното зголемување на бројот на македонски мировници во мисијата ИСАФ во Авганистан, министерот Бесими најави дека Македонија ќе ги следи чекорите на земјите – членки на НАТО.

„Засега остануваме на истата бројка војниците кои ги имаме во Авганистан“, рече министерот.

Првиот човек на македонската одбрана најави единствено зголемување на бројот на обучувачи на воената полиција на Авганистан – заеднички проект со Албанија, Босна и Херцеговина, Хрватска и Црна Гора.

Бесими имал и одвоена средба со заменик-помошникот државен секретар Филип Рикер, а во советодавната организација Атлански совет на затворена седница заедно со министерот за надворешни работи Никола Попоски во четврток ќе ги изложи македонските позиции за членство во НАТО.

Во Конгресот, Бесими се сретнал со конгресмените од Њујорк, Њу Џерси и Северна Каролина, Елиот Енгел, Бил Паскрел и Дејвид Прајс./крај/воа/ап/